لە 2013دا 90 قوتابخانە لەپارێزگای هەولێر دروستكراون

15/01/2014

لە یەك ساڵدا تەنیا دوو خێرخواز قوتابخانەیان دروست كردوە لەكۆنگرەیەكی رۆژنامەوانییدا بەڕێوەبەری گشتی پەروەردەی هەولێر بەكر كەریم پوختەی ئامار و چالاكییەكانی ساڵی 2013ی خستە روو كە تێیدا 90 قوتابخانە دروستكراون لەگەڵ نۆژەنكردنەوەی 539 قوتابخانە و 37 باخچەی ساوایان بە بڕی 16 ملیار و 645 ملیۆن و 253 هەزار دینار. م.بەكر كەریم گوتی بەڕێوەبەرایەتی گشتی پەروەردەی هەولێر 11 پەروەردە لەخۆدەگرێ كە 2 هەزار و 140 قوتابخانە و 536 هەزار و 362 قوتابی لەگەڵ 36 هەزار و 175 مامۆستا لەخۆدەگرێت. لەبارەی دەوامی قوتابخانەكانیشەوە روونكردەوە" لەكۆی 2 هەزار و 140 قوتابخانەش 1335 یان یەك دەوامی و 805 یان دوو دەوامیین، بەوەش پارێزگای هەولێر تاكە پارێزگا و یەكەم پارێزگایە لەسەر ئاستی هەرێمی كوردستان كە هیچ قوتابخانەیەكی سێ دەوامیی تێدا نەماوە و بەوەش كێشەكانی پەروەردەیی كەمتربوونەتەوە". لەبارەی پڕكردنەوەی بۆشایی نەبوونی مامۆستای پێویست لەهەندێ لەقوتابخانەكانی سەر بە بەڕێوەبەرایەتی گشتی پەروەردەی هەولێر، بەڕێوەبەری گشتی پەروەردە گوتی" بۆ پركردنەوەی بۆشایی نەبوونی مامۆستا پشتمان بە وانەبێژ بەستووە و ئەوەش كێشەی نەبوونی مامۆستای چارەسەر كردووە، بۆ ساڵی 2013ش بڕی 4 ملیار و 478 ملیۆن و 225 هەزار و 500 دینار بۆ كرێی وانەبێژی لەسەرجەم یازدە پەروەردەكەی هەولێر و بەڕێوەبەرایەتی گشتی پەروەردەی هەولێریش تەرخانكراوە". باسی لەوەشكرد كە بەبەراورد لەگەڵ ساڵی 2012 بڕی كرێی وانەبێژی بەڕێژەی زیاتر لە 50% كەمتربووەتەوە. بەڕێوەبەری گشتی پەروەردەی هەولێر باسی لەوەشكرد كە لەساڵی 2013 توانراوە بەشی هەرە زۆری پێداویستییەكانی قوتابخانەكان دابین بكرێن و لەورووەوە گوتی" لە رێكەوتی 10/11/ تا 17 /12/2013 بڕی 4 ملیۆن لیتر نەوت بەسەر هەموو قوتابخانەكانی سەر بە پارێزگای هەولێر دابەشكراوە، لەگەڵ دابەشكردنی 6 ملیۆن و 521 هەزار و 396 كتێبی مەنهەجی خوێندن بەسەر قوتابخانەكاندا و بەوەش كێشەی نەبوونی كتێب بەشێوەیەكی زۆر چارەسەر كراوە، ئەوە جگە لەدابینكردنی زیاتر لە 17 هەزار كتێبی هەمەجۆر بەسەر كتێبخانەی ئەو قوتابخانانەی كتێبخانەیان هەیە". م.بەكر كەریم لەدرێژەی قسەكانیدا لەو كۆنگرەیە رۆژنامەوانییە گوتی" لەكۆتایی ساڵی 2013 بۆ كڕینی پێداویستییەكانی قوتابخانە بڕی 2 ملیار و 311 ملیۆن و 750 هەزار دینار تەرخانكراوە، كە بەشێكیان بەمنزیكانە تەواو دەكرێن وبە بڕی 2 ملیار و 88 ملیۆن و 850 هەزار دینار دابین دەكرێن، هەرچی ئەو پارەیەیە كە لەو بڕە ماوەتەوە دەگاتە 222 ملیۆن و 150 هەزار دینار بۆ وەزارەتی دارایی گەڕێنراوەتەوە بۆ وەزارەتی پەروەردە". بەڕێوەبەری گشتی پەروەردەی هەولێر باسی لەوەشكرد بۆ رەخساندنی دەرفەت بۆ زیندانییان لەنێو گرتووخانەكاندا لەساڵی 2013 قوتابخانەیەك لە چاكسازیی گەوران(زیندانی) لەهەولێر كراوەتەوە و 150 قوتابیی هەیە لە پۆلەكانی یەكەم تا شەشەمی بنەڕەتی. جگە لە كردنەوەی دوو قوتابخانە تایبەت بەو پێشمەرگانەی بەهۆی دەوامەوە یان بەهۆی دواكەوتن لەخوێندنەوە دەیانەوێ درێژە بەخوێندن بدە، ژمارەی ئەو قوتابییانەش لە دوو قوتابخانەیە و 595 قوتابیین". بەكر كەریم هێمای بۆ ئەوەشكرد كە لەساڵی 2013 هەشتاوهەشت قوتابخانە بەگوژمەی 40 ملیار و 124 ملیۆن و 894 هەزار دینار دروستكراون، جگە لەدروستكردنی دوو قوتابخانەی تر لەلایەن دوو خێرخوازەوە، كە قوتابخانەی یەكەمیان لەلایەن د.عەلی رفاعی لە گوندی باغەمرە و قوتابخانەیەك لەكورانی عەنكاوە لە لایەن كۆمپانیای یونایتد برازەرەوە دروستكراون. ئەمە جگە لەوەی لەساڵی 2013دا ژمارەی ئەو قوتابخانانەی نۆژەنكراونەتەوە دەگاتە 539 قوتابخانە و 37 باخچەی ساوایان لەساڵی رابردوو لەسەر بودجەی سامانە سروشتییەكان و بودجەی ئاسایی پەروەردەكان بە بڕی 16 ملیار و 645 ملیۆن و 253 هەزار دینار. م. بەكر كەریم لەدرێژەی قسەكانیدا لەو كۆنگرە رۆژنامەوانییەی لە بینای پەروەردەی گشتی لەهەولێر بەستی باسی كارەكانی دامەزراوەكەیان كرد بۆ دابینكردنی دەرفەتی خوێندن بۆ كوردانی رۆژئاوا و لەوبارەیەوە گووتی هەوڵی پێویست دراوە بۆ ئەوەی هیچ قوتابییەك لەكوردانی رۆژئاوا بێ بەش نەبن لەخوێندن.لەوبارەیەوە گوتی" لە هەر چوار كەمپی كەورگۆسك، قوشتەپە، باسرمە، دارەشەكران قوتابخانە بۆ رۆڵەكانی كوردانی رۆژئاوا كراونەتەوە، ژمارەی قوتابییانی ئەو كەمپانە دەگاتە 4 هەزار و 541 قوتابی، هەروەها 2 هەزار و 821 قوتابیی دیكە لەناو شارەكان لە 17 قوتابخانەی بنەڕەتی و 6 ئامادەیی دەخوێنن كە ژمارەی قوتابیانی بنەڕەتی 2539 قوتابین، 282 قوتابیش ئامادەیی و ئەو پەڕی هەولێ دەدرێ لەگەڵ رێكخراوەكانی بارزانی نەمر و رێكخراوی یونسێف و رێكخراوی تر بۆ ئەوەی هاوكاریی زیاتر بكرێن لەلایەن پرۆسەی پەروەردەوە". گوتیشی كۆمەك و هاوكاریی دیكەش بە بڕی 59 ملیۆن دینار بۆ ئەو كەمپانە و قوتابییەكانیان دابینكراوە. سەرباری دامەزراندنی 230 مامۆستا و بەردەست و فەرمانبەر لەو كەمپانە. بەڕێوەبەری گشتیی پەروەردەی هەولێر باسی لەگرنگیی خوێندن بەزمانی دایك و رەخساندنی دەرفەت بۆ نەتەوە و ئاوارەكانیش كرد ئەوانەی لەهەرێمی كوردستان و بەتایبەت لەپارێزگای هەولێرن كرد و گوتی خوێندن بەزمانی دایكە، لەمبارەیەوە گوتی" لەكۆی 2 هەزار و 140 قوتابخانە هەزار و 89 قوتابخانە بەزمانی كوردی دەخوێنن كە زمانی دایكە بۆ قوتابییە كوردەكان، جگە لەوەش خوێندن لە 51 قوتابخانەی دیكە بەزمانەكانی عەرەبی، سریانی، توركمانییە ئەوەش بەمەبەستی ئاسانكردنی پرۆسەی خوێندن و رەخساندنی باری گونجاو بۆ ئەو قوتابییانە". زمانەكانی خوێندن لەپاڵ زمانی كوردی بەمشێوەیەیە 13 قوتابخانەی بنەڕەتی و ئامادەیی خوێندنی سریانی هەیە كە كۆی قوتابیانی دەگاتە 2 هەزار و 750 قوتابی، 15 قوتابخانەی بنەڕەتی و ئامادەیی و باخچەی ساوایانی خوێندنی توركمانی هەن كە 1377 قوتابی تێیاندا بەزمانی توركمانی دەخوێنن، 23 قوتابخانەی بنەڕەتی و ئامادەیی هەن بۆ خوێندنی بەزمانی عەرەبی كە 15 هەزار و 351 قوتابی تێیدا دەخوێنن. لەبارەی ئاماری ئەو قوتابخانانەشەوە گوتی" 13 قوتابخانەی بنەڕەتی و ئامادەیی خوێندنی سریانی هەیە كە كۆی قوتابیانی دەگاتە 2 هەزار و 750 قوتابی، 15 قوتابخانەی بنەڕەتی و ئامادەیی و باخچەی ساوایانی خوێندنی توركمانی هەن كە 1377 قوتابی تێیاندا بەزمانی توركمانی دەخوێنن، 23 قوتابخانەی بنەڕەتی و ئامادەیی هەن بۆ خوێندنی بەزمانی عەرەبی كە 15 هەزار و 351 قوتابی تێیدا دەخوێنن". هەرچی كارگەكانی دارتاشی و ئاسنگەریی سەر بە بەڕێوەبەرایەتی گشتی پەروەردەی هەولێرە، ئەوا لەماوەی ساڵی 2013دا چەندین چالاكیی هەبووە كە لە پێشەوەیاندا دروستكردنی رەحلەیە بۆ قوتابیان، لەوبارەیەوە م.بەكر كەریم ئامارەكانی بەمشێوەیە نیشاندا".لەماوەی ساڵی 2013 دا 16 هەزار و 44 رەحلە بەمشێوەیە(دروستكردنی 9 هەزار رەحلەی نوێ، 8000 دوو كەسی و 1000 رەحلەشیان یەك كەسی)، هەروەها چاككردنەوەی 7044 رەحلە، 4815 یان دوو كەسی، 2229 رەحلەش یەك كەسی بوون، جگە لەدروستكردنی 220 كەرویت و تا ئێستاش 150 دانەیان لێ دابەشكراوە، چاككردنەوەی 350 رەحلە لە شوێنی خۆی لەناو قوتابخانەكان، دروستكردنی مێزی ئاسن و مەستەبەی دانیشتن و رەفی كتێبخانە". بەڕێوەبەری گشتی پەروەردەی هەولێر باسی لەوشكرد كە لەسەرجەم قوتابخانەكانی كچان لە قۆناغی بنەڕەتی و ئامادەیی كراوەتە مەرج كە فرۆشگاكانیان ئافرەتی لەسەر بێت، كە هەر لەسەر پێشنیازی پەروەردەی گشتی هەولێر گشتاندنی بۆ كرا لەسەر ئاستی هەرێم . لەبارەی ژمارەی سەردانەكانیشەوە گوتی لەساڵی 2013دا بەگشتی 967چالاكی و سەردانی قوتابخانەكان و كۆبوونەوە و بەسەركردنەوەی هۆڵی تاقی كردنەوەكانی هەبووە، لەگەڵ ئەنجامدانی 285 كۆبوونەوەی جۆراوجۆر، لەگەڵ 603 سەردانی قوتابخانەكان بەگشتی كە 292 یان لەكاتی دەوامی ئاسایی بووە و 311 شیان لە كاتی تاقیكردنەوە بووە، هەروەها 70 چالاكی جۆراوجۆر هەبوون. لەبارەی باخچەكانی ساوایانیشەوە بەڕێوەبەری گشتی پەروەردەی هەولێر روونی كردەوە بۆ یەكەم جارە لە 11 قوتابخانە باخچەكانی ساوایان كراونەتەوە لەناوەندی هەولێر و لەدەوروبەریشی، 24 باخچەی ساوایان لەناو شاری هەولێر دەوامیان لە 8ی بەیانییەوە تا 4ی ئێوارەیە بۆ ئەوەی فەرمانبەران و مامۆستایان ناچار نەبن مناڵانیان ببەنە باخچەكانی ئەهلی كە پارەیەكی زۆر دەكەوێتە سەریان، لەو باخچانەشی كراونەتەوە بۆیان ساڵانە تەنها 100 هەزار دیناریان لێ وەردەگیرێ.هەر ئەو 24 باخچانە دەتوانن دەوامی ئێوارانییان واتە لە 12 ی نیوەڕۆ تا 4 ی ئێوارە منداڵانی گەڕەك وەربگرن، كردنەوەی دوو باخچەی ساوایانی هاوشێوەی نێودەوڵەتی بەناوەكانی باخچەی ساوایانی ( رۆژ و چەم ). كە دەوامیان لە 8 تا 3ی ئێوارەیە و پرۆگرامیان بەزمانی ئینگلیزییە و دەرفەت بۆ هەموو منداڵێك بەیەكسانی و بێ جیاوازی دەڕەخسێت. لەبارەی دامەزراندنیشەوە بەكر كەریم باسی لەوەكرد كە لەساڵی 2013 و بەپێی سیستەمی پەیڕەوكراو لەلایەن حكومەتەوە پشكی بەڕێوەبەرایەتی پەروەردەی هەولێر بریتی بووە لە دامەزراندنی 1 هەزار و 82 كەس، جگە لەدامەزراندن بەگرێبەستی نوێ بۆ 300 كەس لە مامۆستا و فەرمانبەر، هەروەها 481 كەسیش خانەنشین كراون، هاوكات هەر لەو ساڵەدا 5445 مۆڵەت بەگشتی هەبووە، 3 هەزار و 242یان مۆڵەتی دایكایەتی و 405 مۆڵەتی درێژخایەن و 232 مۆڵەتی بێ موچە.

ئەم پەیجە 375 جار بینراوە



Copyright © Ministry Of Education. All Rights Reserved. بۆ سەرەوە